ମଇନା-ଛବି କୁମାରୀ କଥା ମନ ଦେଇ ଶୁଣ
ସଂସାରେ ଆଲୋକିତ ଅଟେ ଦିହିଁଙ୍କ ରୂପ ଗୁଣ ।
ଗୋବରା ଭୂତ କହିଲା ଦିନେ ଥୋବରା ମୁହଁ କାଢି
ଧୋବା ରାମକୁ ମାଗି ଯାଇ ଜୋବରା ନିଶ ଦାଢି ।
ରାତି ଅଧରେ କଦରେ ପଶି ରାଣୀଙ୍କ ଉଆସରେ
ମଇନାଟାକୁ ଚୋରାଇ ନେବି ଆପଣା ସାହାସରେ ।
ଧୂମା ସୈତାନ କହିଲା ତାକୁ ନିକୁଟି ଭଙ୍ଗା ଦାନ୍ତ
ଜାଣିଲେ ରାଜା ହାଣିବ ତୋର ଆଗେ ଡାହାଣ ହାତ ।
ଫୁର୍ରୁ କିନା ହସିଲା ଭୂତ କହିଲା ଦୁରୁ ଦୁରୁ
ଉଠିବ ଝଡ ତୋଫାନ ଖାଲି ଛୁଟିବ ଗୁରୁ ଗୁରୁ ।
କଜିଆ କରି ଦିହିଁଙ୍କି ଦିହେଁ ହୋଇଲେ କୋଡା କୋଡି
ଗୋଡି ମାଟିରେ ପହରେ ଯାଏ ଲାଗିଲେ ଗଡାଗଡି ।
ଫାଟିଲା ମୁଣ୍ଡ ବହିଲା ଖାଲି କାଳିଆ ରକ୍ତ ଧାରା
ଉଡି ଆସିଲେ ଗୁରୁର୍ ଗାରର୍ ଯୋଡିଏ ଧଳା ପାରା ।
କାନ ପଜାଇ ପୁଣ ସଧୀରେ ମନକୁ ରଖ ଟାଣି
ମଇନା କୁମାରୀ – ଛବି କୁମାରୀ କାହାଣୀ ।
ସମୟାନୁକ୍ରମେ ସେ ଦୁହେଁ ତଥା ମଇନା ଓ ଛବି ଯୁବତୀ ହେଲେ । ରାଜାଙ୍କର ଏହି ଝିଅ ଯୋଡିଏ ଛଡା ଆଉ ପୁଅପାତି କିଛି ବି ହେଲେନି । ତେଣୁ ରାଜା ତାଙ୍କ ମନ୍ତ୍ରୀଙ୍କ ସଙ୍ଗେ ପରାମର୍ଶ କରି ସ୍ଥିର କଲେ ଗୋଟିଏ ଝିଅକୁ ଦାନ ଯୌତୁକ ଦେଇ ବିଭା କରିଦେବା, ଆଉ ଗୋଟିଏ ଝିଅକୁ ଘର ଜୋଇଁୟା କରିବା । ଏହି କଥାଟା ରାଣୀମାନେ ବି ଶୁଣିଲେ । ସେ କହିଲା ମୋ ଝିଅ ହେବ, ୟେ କହିଲା ମୋ ଝିଅ ହେବ । ରାଜା ସମସ୍ତଙ୍କ କଥାରେ ହଁ ମାରନ୍ତି । ହେଲେ ତାଙ୍କ ମନ କଥା ମନରେ ହିଁ ଥାଏ, ସେ କାହାକୁ ବି କିଛି କହନ୍ତିନି ।
