ଏହା ଶୁଣି ଗୋପାଳ ଭାଣ୍ଡର ଭାର୍ଯ୍ୟା ତତ୍କ୍ଷଣାତ୍ ଗଲା । ବାଟରେ ଭାବିଲା ପ୍ରଭୁଙ୍କ କୃପାରେ ଆଜି ଦେଖା ପଡିବକି ତେବେ ତାହାର ବଦମାସୀ ଛଡାଇ ଦେବି । ଏହି ପରି ମନରେ ଭାଳି କ୍ରୋଧରେ ଜର୍ଜ୍ଜର ହୋଇ ବୈଠକ ଖାନାକୁ ଗଲା ।
ଏଣେ ଜୋଇଁ ଚୋର ଗୋଳ ଶୁଣି ଚୋର ଧରିବା ମାନସରେ ଚୁପ୍ ହୋଇ ବସି ଅଛି । ଶାଶୁ ଗଉଡୁଣୀକି ଧରିବା ସକାଶେ ଚୁପ୍ ଚୁପ୍ ହୋଇ ଘର ଭିତରକୁ ଯାଇ ଜୋଇଁକି ଗଉଡୁଣୀ ମନେ କରି ଜୋଇଁ ହାତକୁ ଦୃଢ ଭାବରେ ଧରି ପକାଇଲା । ଜୋଇଁ ବି ମଧ୍ୟ ଶାଶୁକୁ ଚୋର ମନେ କରି ଶାଶୁର ହାତକୁ ଦୃଢ ଭାବରେ ଧଇଲା । ଅନ୍ଧାର ଘରେ ଦୁହେଁ ଯାକ ଠେଲା ପେଲା ହେଲେ, ଜୋଇଁ ଚୋର ଚୋର ବୋଲି ଡାକ ପକାଇଲା ।
ଗୋପାଳ ଭାର୍ଯ୍ୟାର ପଛେ ପଛେ ଚୁପ୍ ଚୁପ୍ ହୋଇ ଯାଉ ଥିଲା । ଦୁହିଁଙ୍କର ଚୋର ଧରା ଧରି ରହସ୍ୟ ଦେଖି ଗୋପାଳ ଆଲୁଅ ନେଇ ଧାଇଁ ଆସି ପହଁଚିଲା । ଦୁହେଁ ଚିହ୍ନା ଚିହ୍ନି ହୋଇ ଲାଜରେ ପଳାଇଲେ । ଗୋପାଳ ହସି ହସି ଘରେ ଚାବି ଦେଇ ଚାଲି ଗଲା ।
