ଯୁବକଙ୍କ ଡାକ ଶୁଣି ଘର ଭିତରୁ ବିନୋବା କହିଲେ, “ମୁଁ ବର୍ତ୍ତମାନ ବାହାରକୁ ଯାଇପାରିବି ନାହିଁ ।”
ଏବେ ସେ ଯୁବକ ଜଣକ ଆଶ୍ଚର୍ଯ୍ୟ ହୋଇ ପଚାରିବାରୁ ବିନୋବା କହିଲେ, “ଏଇ ଦେଖୁନ, ଏଇ ଖମ୍ବଟି ମୋତେ ପରା ଜାବୁଡି ଧରିଛି । ଏଣୁ ମୁଁ ଏଠାରୁ ଯିବି କିପରି?”
ଏଭଳି ଆଶ୍ଚର୍ଯ୍ୟଜନକ କଥା ଶୁଣି ଯୁବକ ଜଣକ ଘରଭିତରକୁ ଅନାଇ ଦେଖିଲେ, ବିନୋବା ନିଜେ ଗୋଟିଏ ଖମ୍ବକୁ ଜାବୁଡି ଧରିଛନ୍ତି, ହେଲେ କହୁଛନ୍ତି ଓଲଟା କଥା ।
ଏହା ଦେଖି ଯୁବକ କହିଲା, “ଆପଣ ତ ନିଜେ ଖମ୍ବଟିକୁ ଧରିଛନ୍ତି । ଯେତେବେଳେ ଖମ୍ବଟିକୁ ଛାଡିଦେବେ ସେତେବେଳେ ଆପଣ ତା’ଠାରୁ ଅଲଗା ହୋଇଯିବେ ଏବଂ ମୋ’ ପାଖକୁ ଅନାୟାସରେ ଆସିପାରିବେ ।”
ଯୁବକଙ୍କ କଥା ଶୁଣି ବିନୋବା କହିଲେ, “ଠିକ୍ ଏହି କଥା ତ ମୁଁ ତୁମକୁ ବୁଝାଇବାକୁ ଚାହୁଁଥିଲି, ଯାହା ତୁମେ ଆଗରୁ ବୁଝିସାରିଲଣି । ସୁତରାଂ ତୁମର ମଦ୍ୟପାନର ଅଭ୍ୟାସ ତ୍ୟାଗ କରିବାରେ ଅସୁବିଧା ଆଉ କେଉଁଠି ରହିଲା? ତୁମେ ଏହାକୁ ଛାଡୁ ନାହଁ ବୋଲି ଛାଡିପାରୁନ । ଯେତେବେଳେ ଚାହିଁବ ଛାଡିପାରିବ, ଯେପରି ମୁଁ ଖମ୍ବଟିକୁ ଛାଡିଦେଇପାରିବି ।”
ପୁନଶ୍ଚ ବିନୋବା ଯୁବକଙ୍କ ଉଦ୍ଧେଶ୍ୟରେ କହିଲେ, “ଏଇଟା କିଛି ବଡ କଥା ନୁହେଁ । ଯେତେବେଳେ ତୁମେ ମଦ୍ୟପାନ କରିବା ଛାଡିଦେବ, ସେତେବେଳେ ମଦ ବି ତୁମକୁ ଛାଡିଦେବ ।”
ସତକୁ ସତ ସେହିଦିନଠାରୁ ସେ ଯୁବକ ଜଣକ ମଦ ଆଉ କଦାପି ଛୁଇଁଲେ ନାହିଁ । ବାସ୍ତବରେ ଦୃଢ ଇଚ୍ଛା ଶକ୍ତି ଓ ସଂକଳ୍ପ ବଳରେ ହିଁ ଖରାପ ଅଭ୍ୟାସକୁ ତ୍ୟାଗ କରାଯାଇପାରେ ।
ସୁତରାଂ କୁହାଯାଇଛି –
“କଥାରେ କଥାରେ ସାଧୁସନ୍ଥମାନେ ହିତ ଉପଦେଶ ଦେଇ
ମଣିଷ ଖରାପ ଅଭ୍ୟାସଗୁଡିକୁ ଦିଅନ୍ତି ହେଳେ ଛଡାଇ ।
ଜୀବନେ ଉନ୍ନତି କରିବାକୁ ହେଲେ ନିଜେ ହୁଅ ସାବଧାନ
କୁ ପ୍ରବୃତ୍ତି କିଛି ପୂରାଅନା ମନେ – ଏ ସାଧୁସନ୍ଥ ବଚନ ।”
