ଶେଷରେ ମାଲୁଣୀ ବିରକ୍ତ ହୋଇ ଯାଇ ରାଜ କୁମାରୀ ଛଇଳାଙ୍କ ନିକଟରେ ଏକଥା ପ୍ରକାଶ କରନ୍ତେ, ରାଜ କୁମାରୀ ଛଇଳା ରାଗରେ ପଂଚମ ହୋଇ ନିଜର ସଖୀ ସହଚରୀ ମାନଙ୍କୁ ସାଙ୍ଗରେ ଧରି ଆସି ଉଦ୍ୟାନରେ ପହଁଚି ଗଲେ ।
ସେମାନଙ୍କୁ ଦେଖିବା ମାତ୍ରେ ବିଜୟ ସେନ୍ ସହଜରେ ରାଜ କୁମାରୀଙ୍କୁ ଚିହ୍ନି ପାରିଲା । କାରଣ ଶୁଆ ରାଜକୁମାରୀଙ୍କ ଗାଲରୁ ମାଂସ ପୁଳାଏ ଉଠାଇ ନେଇ ଥିଲା । ସେ ତହୁଁ ରାଜକୁମାରୀଙ୍କୁ ଦେଖୁ ଦେଖୁ କହିଲେ ମୁଁ ତୁମକୁ ବିବାହ କରିବାକୁ ଆସି ଅଛି ।
ରାଜ କୁମାରଙ୍କ ଠାରୁ ଏକଥା ଶୁଣି ରାଜ କୁମାରୀ କହିଲା – ମୋତେ ବିବାହ କରିବାକୁ ହେଲେ ମୋର ପ୍ରତିଜ୍ଞାତ ପୂରଣ କରିବାକୁ ହେବ । ମୋର ପ୍ରଶ୍ନର ଉତ୍ତର ଯେ ଦେଇ ପାରିବ ମୁଁ ତାଙ୍କୁ ବିବାହ କରିବି ।
ବିଜୟ ସେନ୍ କହିଲେ – ମୁଁ ତୁମ ପ୍ରଶ୍ନ ଗୁଡିକର ଉତ୍ତର ଦେବାକୁତ ପ୍ରସ୍ତୁତ ହୋଇ ଆସିଛି । ଏହା ପରେ ରାଜ କୁମାରୀ ଯେତେ ପ୍ରଶ୍ନ ପଚାରିଲେ ବିଜୟ ସେନ୍ ସମସ୍ତ ପ୍ରଶ୍ନର ଉତ୍ତର ସଠିକ୍ ଭାବରେ ଦେଇ ଦେଲେ । ଏଥର ରାଜ କୁମାରୀ ଆବାକ୍ ହୋଇ ବିଜୟ ସେନ୍ଙ୍କ ମୁଖକୁ ଚାହିଁ ରହିଲେ ।
ତା’ପରେ ରାଜ କୁମାରୀ ବିଜୟ ସେନ୍ଙ୍କୁ ରାଜ ଉଆସକୁ ନେଇ ଯାଇ ଉପଯୁକ୍ତ ଆସନ ଦେଇ ବସାଇଲେ ଆଉ ପିତାଙ୍କ ଆଗରେ ସମସ୍ତ କଥା କହିଲେ ।
ରାଜା ଖୁସି ହୋଇ ଯାଇ କହିଲେ – ଏଥର ମୁଁ ତୁମ ସହିତ ମୋର କନ୍ୟାକୁ ବିବାହ ଦେବି । ସେଥି ଲାଗି ଆଗ ଶୁଭ ଦିବସ ସିଦ୍ଧାନ୍ତ କରିବାକୁ ହେବ ।
